William Outcast
William Outcast

相關文章

William Outcast
斑點人。畢生志願:活得招積,死不足惜。

香港冇哂人情味㗎喇

 

久唔久就會話香港再冇街坊情,再冇人情味,又話香港人係冷血呀咁。當然,應該冇人一出世就係冷血,就係對世界漠不關心。人之所以冷血,好可能係自己嘅信任經常被過度消費所引致。

街坊情跟人情味之所以買少見少,或多或少都跟土地有關。香港土地昂貴,所有租客都變成遊牧民族,基本上每年都要搬一搬,即使係業主也敵不過地產商而被迫搬走。人在情在,人都留唔住情又何去何從。

不過咁,即使係遊牧民族,只要你想,都仍然可以有群體生活,即使可能要多啲成本,例如車錢。

以我自己為例,細細個住沙田大圍,基本上日日都總會去田心村一間茶餐廳,一路幫襯開嗰陣都冇乜感情可言,有時候仲會怪啲嘢難食呀佢哋態度差呀等等,總之一直住喺度一直都唔當呢間餐廳係一回事,直至搬離大圍一年後才發覺自己對呢間茶記係有啲啲感情,搬走之後成日都扮哂嘢搵機會返去食吓嘢,雖然對伙記同食物係完全冇感情,但唔知點解都仍然想得閒就返吓去hea一吓,可能呢啲就係街坊情。

另外如果講人情味,真係不得不提中環嗰間勝香園。注意,係歌賦街嗰間勝香園。從來都冇住過喺中環,但記得十幾年前開始,一有機會就去食油檸蜜脆脆,可能係自己嘅外表比較有型,去第二次佢哋已經當我係熟客仔。而呢十幾年期間可能因為唔夠錢幫襯或大病等等唔同原因都試過有幾次成年都冇去過一次。但一去返幫襯嗰陣無論係佢哋一家人定係蓮姐都一定會問候我,蓮姐一見到我好耐冇去第一句通常都會話:「哇!搞mood鬼貢耐唔來幫襯呀吓!衰仔包!」而佢哋嗰幾兄弟姊妹則會擔心我身體又出現啲小毛病,試過細佬話:「係咪食厭咗轉去食高級嘢呀!」但其實大家都深知道口硬心軟,無論口嗰句講乜都好,心嗰句肯定係「終於蒲頭喇咩,知唔知道我哋全部人有幾掛住你。」

香港,其實只要你想,只要你肯去搵,只要你盡力將佢留住,香港的人情味依然可以嗅死你甚至嗅死隔籬。